جرمنی میں مقامی میڈیا نے بتایا ہے کہ جمعرات کی شام مغربی شہر اوبرہاؤزن میں چاقو سے حملے کے واقعے میں متعدد افراد زخمی ہو گئے۔
جرمن اخبارات نے شہر میں مقامی پولیس کے حوالے سے بتایا ہے کہ بعض زخمیوں کی تشویش ناک حالت کے باعث انہیں انتہائی نگہداشت کے یونٹ میں رکھا گیا ہے۔
باخبر ذرائع کے مطابق واقعے میں 5 افراد زخمی ہو گئے۔ دوسری جانب پولیس کا کہنا ہے کہ بظاہر یہ خاندانی تنازع لگ رہا ہے۔
پولیس ترجمان نے بتایا کہ حملہ آور سمیت پانچ افراد کا علاج ہسپتال میں ہوا اور کم از کم ایک زخمی کی حالت نازک ہے۔
بعد ازاں یہ خبریں آئیں کہ حکام نے حملے کے سلسلے میں ایک مشتبہ شخص کو گرفتار کر لیا۔
بعض جرمن نیوز ویب سائٹس کے مطابق مشتبہ مجرم کو چوٹیں آئی ہیں اور وہ سخت پہرے میں ہے۔ ابھی تک حملے میں استعمال ہونے والے ہتھیار کی نوعیت واضح نہیں ہو سکی۔
