سعودی عرب: 90 فیصد عوام نے 'کویڈ ۔ 19' کے 'ایس اوپیز' پر عمل درآمد کیا

سعودی عرب کی دو جامعات کی طرف سے کی گئی ایک تحقیق میں‌ بتایا گیا ہے کہ مملکت میں عوام نے کرونا وبا کی روک تھام کے لیے مقرر کردہ ضابطہ اخلاق کی 90 فی صد پابندی کی گئی جس کے نتیجے میں مملکت میں وبا کو قابو میں رکھا گیا ہے۔

العربیہ ڈاٹ‌ نیٹ کے مطابق سعودی عرب کی حائل اور طائف یونی ورسٹیوں کی طرف سے ایک تحقیقی رپورٹ میں‌ کہا گیا ہے کہ رواں سال کرونا کی وبا کی روک تھام کے لیے حکومت کی طرف سے وضع کردہ 'ایس او پیز' پر عوام کی طرف سے 90 فی صد عمل درآمد کیا گیا۔

جامعہ حائل کے پروفیسر ڈاکٹر عبدالرحمان بازید نے العربیہ ڈاٹ نیٹ سے بات کرتے ہوئے کہا کہ سعودی عرب کے عوام میں وبا کے حوالے سے بیداری کا بھرپور احساس موجود ہے۔ کرونا کی وبا کی روک تھام کے حوالے سے عوام نے حکومتی اقدامات پر بھرپور عمل درآمد کیا ہے۔

رپورٹ میں کہا گیا ہے کہ سعودی عرب کے 80 فی صد عوام میں کرونا کی وبا کے خلاف ضابطہ اخلاق پرپابندی کا یقین موجود ہے۔ عوام الناس کو وبا کی روک تھام کے لیے گھروں میں رہنے، سماجی دوری ، ماسک اور سینی ٹائرز کے استعمال کا شعور یقین کی حد تک موجود ہے۔