.

ڈونلڈٹرمپ نے جاتے جاتے؛یو اے ای سے درآمدہ ایلومینیم پر ٹیرف ختم کردیا

پہلی اشاعت: آخری اپ ڈیٹ:

امریکا کے سبکدوش صدر ڈونلڈ ٹرمپ نے بدھ کو اپنے اقتدار کے آخری روزجاتے جاتے متحدہ عرب امارات کو ایلومینیم کی درآمدات پر عاید کردہ 10 فی صد ٹیرف سے مستثنا قرار دینے کا اعلان کیا ہے۔

انھوں نے دوسرے ممالک کی طرح یو اے ای کی ایلومینیم کی درآمدات پر 2018ء میں نئے محصولات عاید کرنے کا فیصلہ کیا تھا۔ان کا کہنا ہے کہ دونوں ملکوں کے درمیان اس ضمن میں ایک سمجھوتا طے پاگیا ہے،اس سے ایلومینیم کی درآمدات پر قدغنیں عاید کی جائیں گی۔

امریکا کے نئے صدر جوبائیڈن کی حلف برداری سے قبل وائٹ ہاؤس نے ایک اعلامیہ جاری کیا ہے۔اس کے مطابق صدر ٹرمپ نے کہا ہے کہ دونوں ملکوں کے درمیان اہم سکیورٹی تعلقات کے پیش نظر یہ سمجھوتا طے پایا ہے۔

امریکا نے یو اے ای سے قبل ارجنٹینا، آسٹریلیا ، کینیڈا اور میکسیکو کوایلومینیم کے ٹیرف سے مستثنا قرار دے دیا تھا اور ان سے امریکا میں درآمدہ ایلومینیم پر محصولات عاید نہیں ہوتے۔

اس اعلامیے کے اجرا کے بعد ڈونلڈ ٹرمپ وائٹ ہاؤس سے ریاست فلوریڈا کے لیے روانہ ہوگئے تھے۔وہ امریکا کی ایک صدی سے زیادہ تاریخ میں پہلے سبکدوش صدر ہیں جنھوں نے اپنے جانشین صدر جو بائیڈن کی حلف برداری کی تقریب میں شرکت نہیں کی ہے۔اس کے بجائے وہ نئے صدر کے لیے ایک خط چھوڑ گئے ہیں۔

مقبول خبریں اہم خبریں