.

سیلفی کے بہانے پہاڑی پر لے جا کر شوہر نے بیوی کو نیچے دھکیل دیا

پہلی اشاعت: آخری اپ ڈیٹ:

ترکی میں ایک شوہر نے سیلفی بنانے کے بہانے پہاڑی کی چوٹی پر جا کر وہاں سے اپنی بیوی کو نیچے گرا دیا۔ یہ واقعہ موغلہ صوبے کے شہر فتحیہ میں پیش آیا۔

برطانوی اخبار "دی سَن" نے منگل کے روز بتایا کہ 40 سالہ ترک شہری ہاکان ایسال کو اپنی 32 سالہ بیوی سیمرا ایسال کے خلاف اقدام قتل کے الزام میں حراست میں لے لیا گیا۔ ہاکان نے اس حرکت کا ارتکاب جون 2018ء میں موغلا میں واقع ایک وادی کی سیر کے دوران کیا۔

استغاثہ نے ہاکان پر الزام عائد کیا ہے کہ اس نے اپنی بیوی کو پہاڑی کے کنارے سے دھکا دے دیا تھا جس کا فاصلہ زمین سے ایک ہزار فٹ کے قریب ہے۔ اس مجرمانہ کارروائی کا مقصد اپنی بیوی کی موت کے بعد بیمہ کی رقم کا حصول تھا۔ واقعے میں ہاکان کی حاملہ بیوی اور اس کے بطن میں موجود سات ماہ کا بچہ موت کا شکار ہو گئے۔

استغاثہ کے نمائندوں کا کہنا ہے کہ دونوں میاں بیوی کے تین گھنٹے تک پہاڑ کی چوٹی پر بیٹھے رہنے کا واحد سبب اس بات کو یقینی بنانا تھا کہ ان کے اطراف کوئی فرد موجود نہ ہو۔

شوہر کے خلاف تیار کی گئی الزامات کی فہرست میں کہا گیا ہے کہ اس نے یہ منصوبہ بیمہ کمپنی سے رقم حاصل کرنے کے لیے تیار کیا جس کی مالیت 40865 برطانوی پاؤنڈ تھی۔