.

ٹیسلا گاڑیوں کی بٹ کوائن سے خریداری کی جاسکے گی: ایلون مسک

پہلی اشاعت: آخری اپ ڈیٹ:

ٹیسلا کمپنی کے مالک اور دنیا کے دوسرے سب سے امیر ترین شخص ایلون مسک کا کہنا ہے کہ ٹیسلا کی گاڑیاں بٹ کوائن کی مددسے خریدی جاسکتی ہیں اور رواں سال کے دوران ہی یہ سہولت امریکا کے باہر بھی متعارف کروا دی جائے گی۔

ایلون مسک نے اپنے ٹویٹر اکائونٹ سے جاری ایک ٹویٹ میں کہا کہ "اب صارفین بٹ کوائن کی مددسے ٹیسلا خرید سکیں گے۔ ٹیسلا کو حاصل ہونے والے بٹ کوائن کو روایتی کرنسی میں تبدیل کرنے کی بجائے بٹ کوائن اکائونٹ میں ہی رکھا جائے گا۔"

پچھلے ماہ کے دوران ٹیسلا کمپنی نے بٹ کوائن میں ڈیڑھ ارب ڈالر کی سرمایہ کاری کی تھی جس کے نتیجے میں بٹ کوائن کی قیمت کو پر لگ گئے تھے۔ اس وقت ایک بٹ کوائن کی قیمت 55 ہزار 303 ڈالر ہے۔

یاد رہے امریکی ٹیکنالوجی کمپنی ٹیسلا کے سربراہ ایلون مسک اس وقت دنیا کے دوسرے امیر ترین شخص بن گئے ہیں۔ ان کی کمپنی ٹیسلا کے شیئرز کی قیمت188 بلین ڈالر سے تجاوز کر گئی ہے۔

ان کے کمپنی کے شیئرز کی قیمت میں ایک ساتھ 6 فیصد اضافہ ہوا جس کے ایلون مسک کے اثاثوں کی مالیت188.5 بلین ڈالر ہوگئی ہے۔

ایلون مسک کی دولت میں کورونا وائرس کے باوجود 12 ماہ کے دوران 146 بلین ڈالر کا اضافہ ہوا۔

اندازہ لگایا گیا تھا کہ ٹیسلا کمپنی سال2020 میں 4 لاکھ81 ہزار261 الیکٹرک گاڑیاں فروخت کر سکے گی لیکن کمپنی نے اندازے سے زیادہ 4 لاکھ 99 ہزار550 گاڑیاں فروخت کیں۔ ٹیسلا کی فروخت میں اس وقت اضافہ ہوا جب کمپنی نے شنگھائی میں اپنی فیکٹری کھولی۔