سعودی عرب:کووِڈ-19کےیومیہ کیسوں میں پھراضافہ،531 نئے مریضوں کی تشخیص

سعودی عرب میں کروناوائرس کے یومیہ کیسوں کی تعداد میں اکتوبرکے بعد ایک مرتبہ پھر اضافہ شروع ہوگیا ہے اور سعودی وزارتِ صحت نے اتوار کو گذشتہ 24 گھنٹے میں کووِڈ-19 کے 531 نئے کیسوں کی تشخیص کی اطلاع دی ہے جبکہ سات مریض وفات پا گئے ہیں۔

وزارتِ صحت کے مطابق اب مملکت میں کروناوائرس کے کیسوں کی کل تعداد 388325 ہوگئی ہے۔ان میں سے 6650 افراد وفات پاچکے ہیں اور376947 مریض صحت یاب ہوچکے ہیں۔جمعہ کوکووِڈ-19 کے510 اور ہفتے کو 502 کیس ریکارڈ کیے گئے تھے۔

سعودی وزارت صحت نے کہا ہے کہ لوگ کرونا وائرس سے بچاؤ کے لیے عاید کردہ پابندیوں کی مکمل پاسداری نہیں کررہے ہیں، وہ اجتماعات میں شریک ہورہے ہیں اور باہمی میل جیل میں سماجی فاصلہ بھی برقرار نہیں رکھ رہے ہیں۔اس کی وجہ سے ایک مرتبہ پھر یومیہ کیس بڑھنا شروع ہوگئے ہیں۔

سعودی عرب میں جنوری میں کووِڈ-19 کے یومیہ کیسوں کی تعداد میں نمایاں کمی واقع ہوئی تھی اور یومیہ کیس ایک سو سے بھی کم ہوگئے تھے جبکہ گذشتہ سال جون میں ایک دن میں کروناوائرس کے مریضوں کی تعداد چارہزار سے متجاوزہوگئی تھی۔

سعودی حکام نے گذشتہ ہفتے مملکت بھرمیں کووِڈ-19 کی ویکسین لگانے کی مہم میں توسیع کا اعلان کیا تھا۔اب وسط مئی سے 16 سال یا اس سے زیادہ عمر کے تمام شہریوں اور مکینوں کو ویکسین لگائی جائے گی۔

حکام نے واضح کیا ہے کہ اگرکھانوں کے مراکز، پبلک ٹرانسپورٹ ، جیم اور سیلونوں میں کام کرنے والے ورکر ویکسین نہیں لگوائیں گے تو انھیں ہر ہفتے پی سی آر ٹیسٹ کرانا ہوگا۔