ہوائی جہاز میں دوران پرواز زچگی کیس کے باعث طیارے کی ہنگامی لینڈنگ

مصر کی فضائی کمپنی 'ایجپٹ ایئر' کے ایک مسافر جہاز کے افریقی ملک چاڈ سے قاہرہ کے سفر کے دوران ایک خاتون مسافر کے ہاں زچگی کے کیس کے باعث جہاز کا روٹ تبدیل کرکے مصر کے اسوان ہوائی اڈے پر اس کی ہنگامی لینڈنگ کرنا پڑی۔

مصر ایئر لائنز نے بتایا کہ چاڈ کے شہر نجامینا سے آنے والے مصر ایئر کی ایک پرواز کو منگل کے روز مقامی وقت کے مطابق شام پانچ بج کر 50 منٹ پر لینڈ کرنا تھا مگر جہاز کے کپتان کو بتایا گیا کہ ایک خاتون مسافر کو بچے کی پیدائش کی تکلیف ہے جس پر کپتان نے جہاز کا راستہ تبدیل کیا اور نسبتا قریب اسوان کے ہوائی اڈے پر ہنگامی طور پر اتار دیا۔

کمپنی کا کہنا ہے کہ خاتون مسافر کی حفاظت کے لئے تمام ایس او پیز پر عمل کیا گیا اور اس کیس کو جلد نمٹا دیا گیا۔ فلائٹ اٹینڈینٹ نے مسافر خاتون کی بچے کی پیدائش کے عمل میں اس کی مدد اور اس کے ساتھ بھرپور تعاون کیا۔ زچگی کیس نمٹانے کے بعد ہوائی جہاز دوبارہ مسافروں کو لے کر اسوان سے قاہرہ کے لیے روانہ ہوا۔