حوثی باغیوں کے خلاف سرگرم عرب اتحاد کا ایک جنگی طیارہ۔
یمن میں آئینی حکومت کو سپورٹ کرنے والے عرب اتحاد کے جنگی طیاروں نے ہفتے کے روز حجہ صوبے کے دو اضلاع عبس اور مستبا میں حوثی ملیشیا کی عسکری گاڑیوں اور کمک کو نشانہ بنایا۔ یہ بات حجہ میں "العربيہ" کے نمائندے نے بتائی۔
عسکری ذرائع نے "العربيہ" سے گفتگو کرتے ہوئے تصدیق کی کہ اتحادی طیاروں نے 3 فضائی حملے کیے۔ اس دوران ایک فوجی ٹینک ، ایک طیارہ شکن ہتھیاروں کی حامل گاڑی اور حوثیوں کے عسکری مرکز کو نشانہ بنایا گیا۔ یہ کارروائی اس وقت کی گئی جب حوثی ملیشیا کی جانب سے یمنی فوج کے ٹھکانوں پر حملے کی کوشش کی گئی تھی۔
فِفتھ ملٹری زون میں یمنی فوج اور حوثیوں کے درمیان شدید معرکہ آرائی 6 گھنٹوں سے زیادہ جاری رہی۔ اس دوران حوثی ملیشیا نے گذشتہ ماہ کے اوائل میں حجہ صوبے میں اپنے ہاتھ سے نکل جانے والے ٹھکانوں کو یمنی فوج کے کنٹرول سے واپس لینے کی کوشش کی۔
