بھارت: گجرات کے ہسپتال میں اتش زدگی، 18 مریض ہلاک

بھارتی ریاست گجرات کے شہر بہروچ کے ایک ہسپتال میں آگ لگنے کی وجہ سے ہسپتال میں زیر علاج 18 مریض ہلاک ہو گئے۔

بھارتی خبر رساں ادارے پی ٹی آئی کے مطابق ہسپتال میں آگ رات ایک بجے لگی۔ آگ لگنے کے بعد مقامی لوگوں اور آگ بجھانے والے عملے کی مدد سے مریضوں کو ہسپتال سے باہر نکالا گیا۔

ایک پولیس افسر نے میڈیا کو بتایا کہ ہفتہ کی صبح ساڑھے چھ بجے تک مرنے والوں کی تعداد 18 ہے۔ اس سے قبل صرف 12 لوگوں کی موت کی تصدیق ہو سکی تھی۔

بھارتی وزیر اعظم نریندرا مودی نے اس واقعے پر افسوس کا اظہار کیا ہے اور متاثرین کے خاندان سے تعزیت کا اظہار کیا ہے۔