.

یواے ای نے سعودی عرب پرحوثیوں کے ڈرون حملے کی مذمت کردی

پہلی اشاعت: آخری اپ ڈیٹ:

متحدہ عرب امارات نے ایران کی حمایت یافتہ حوثی ملیشیا کے سعودی عرب کے جنوبی علاقے کی جانب بارود سے لدے ڈرون سے حملے کی مذمت کی ہے اور کہا ہے کہ حوثی جنگجو جان بوجھ کر سعودی شہریوں اور شہری اہداف کو اپنے ڈرون اور میزائل حملوں میں نشانہ بنانے کی کوشش کررہے ہیں۔

یو اے ای کی وزارت برائے امورخارجہ اور بین الاقوامی تعاون نے اتوار کو ایک بیان میں اس مؤقف کا اعادہ کیا ہے کہ ’’حوثی جنگجو عالمی برادری اور بین الاقوامی قوانین اور اقدار کو کوئی اہمیت نہیں دیتے ہیں۔ان کے سعودی عرب پر دہشت گردی کے مسلسل حملے اس امر کے مکمل عکاس ہیں۔‘‘

وزارت خارجہ نے عالمی برادری سے مطالبہ کیا ہے کہ وہ سعودی عرب کی سلامتی کے خلاف ان حملوں کو رکوانے کےلیے اپنا کردار ادا کرے۔اس نے مزید کہا ہے کہ حوثی ملیشیا کے یہ حملے خطے کی سلامتی اور استحکام کو نقصان پہنچانے کا واضح ثبوت ہیں۔

عرب اتحاد نے ہفتے کی شب یمن سے سعودی عرب کے شہر خمیس مشیط کی جانب آنے والے بارود سے لدے ایک ڈرون کو تباہ کردیا تھا۔

حوثیوں نے یمن سے حالیہ مہینوں کے دوران میں سعودی عرب کے شہری علاقوں اور شہری تنصیبات کی جانب متعدد ڈرون حملے کیے ہیں۔