چینی عہدیدارکا بُش کے 20سال قبل طالبان کے خاتمے کےدعوے پر طنز

ایک سینیر چینی عہدیدار نے سابق امریکی صدر جارج بش کی 20 سال قبل طالبان کے خاتمے کا اعلان پر مبنی ایک ویڈیو جاری کرتے ہوئے بش کے اس دعوے کا مذاق اڑایا ہے۔

چینی وزارت خارجہ کے ترجمان لیجیان ژاؤ نے کل منگل کو سابق امریکی صدر جارج ڈبلیو بش کا ایک ویڈیو کلپ جاری کیا جس میں 20 سال قبل انہیں طالبان تحریک کے خاتمے کا اعلان کرتے دیکھا جا سکتا ہے۔

بش کے ریمارکس پر تبصرہ کرتے ہوئے چینی وزارت خارجہ کے ترجمان نے اپنے آفیشل ٹوئٹر اکاؤنٹ پر کہا کہ امریکا کے طویل عرصے تک دنیا کا اخلاقی جج رہنے کے بعد اسے معلوم ہونا چاہیے کہ وہ ہر چیز کا مالک نہیں ہے۔ افغان عوام کو اپنے مستقبل کا فیصلہ کرنے کا حق ہے۔

بش نے ویڈیو میں کہا تھا کہ ہماری فوج ، ہمارے اتحادیوں اور بہادر افغان جنگجوؤں کی کوششوں کے ذریعے طالبان کی حکمرانی ختم ہو گئی ہے، لیکن افغان عوام کے حوالے سے ہماری ذمہ داریاں ابھی ختم نہیں ہوئیں ہیں۔ ہم اس ملک میں ایک نئے دور کی داغ بیل ڈال رہے ہیں جس انسانی حقوق اور انسانی وقار کا دور دورہ ہوگا۔

قابل ذکر ہے کہ حال ہی میں افغانستان میں ہونے والے واقعات کی پیش رفت پر بش نے اپنے گہرے دکھ کا اظہار کیا ہے۔ طالبان کی جانب سے امریکی حمایت یافتہ حکومت کو کابل سے بے دخل کرنے پر سابق صدر جارج بش نے افسوس کا اظہار کیا۔