عُمان میں 145 کلو کرسٹل متھ اور چرس اسمگل کرنے کے الزام میں 8 افراد گرفتار

عُمان میں حکام نے دو واقعات میں آٹھ افراد کو مجموعی طور پر 145 کلو گرام نشہ آور کرسٹل متھ اور چرس اسمگل کرنے کی کوشش کے الزام میں گرفتارکر لیا ہے۔

حکام نے ان افراد کو’درانداز‘قرار دیا ہے اور کہا ہے کہ انھوں نے بیرون ملک سے آبی راستے کے ذریعے ملک میں منشیات اسمگل کرکے لانے کی کوشش کی تھی۔

خلیجی ریاست عُمان کی جنرل ایڈمنسٹریشن برائے انسداد منشیات نے ساحلی محافظ پولیس کی کمان کے تعاون سے ان آٹھ ’دراندازوں‘کو اس وقت گرفتار کیا جب وہ ماہی گیری کے لیے استعمال ہونے والی دو کشتیوں کے ذریعے بڑی مقدار میں منشیات اسمگل کرنے کی کوشش کر رہے تھے۔

حکام کے مطابق ان کے قبضے سے 80 کلوگرام سے زیادہ نشہ آوردوا کرسٹل متھ اور 68 کلو گرام چرس برآمد کی گئی ہے۔کرسٹل متھ اعصابی نظام کو تقویت پہنچاتا ہے۔اس کو برف (آئس) کا نشہ بھی کہا جاتا ہے۔