.

بینیٹ سے ملاقات میں بائیڈن کو نیند کی جھپکی آ گئی تھی : نیتن یاہو کا عندیہ

پہلی اشاعت: آخری اپ ڈیٹ:

اسرائیل کے سابق وزیر اعظم بنیامین نیتن یاہو کے مطابق امریکی صدر کی اسرائیل کے نئے سربراہ نفتالی بینیٹ کے ساتھ ملاقات کے دوران میں جو بائیڈن پر نیند غالب آ گئی تھی۔ نیتن یاہو نے اس بات کی جانب اشارہ اتوار کے روز فیس بک پر کی گئی ایک وڈیو پوسٹ میں کیا۔

اس سے قبل روئٹرز نیوز ایجنسی کی ایک رپورٹ میں اس خیال کو غلط قرار دیا گیا تھا کہ بینیٹ کے ساتھ ملاقات کے دوران میں بائیڈن کو نیند کی جھپکی آ گئی تھی۔ سوشل میڈیا کے صارفین نے امریکی صدر کا ایک وڈیو کلپ شیئر کیا تھا۔ اس کے بارے میں صارفین کا کہنا تھا کہ جو بائیڈن وڈیو میں نیچے دیکھتے ہوئے نظر آ رہے ہیں اور ان پر نیند غالب آ گئی جب کہ بینیٹ ان سے وائٹ ہاؤس میں ملاقات کر رہے تھے۔

روئٹرز کی رپورٹ میں واضح کیا گیا کہ وائرل ہونے والا وڈیو کلپ گمراہ کن طور پر کاٹا گیا تھا۔ وڈیو کلپ جس حصے پر ختم ہوا اس کے چند سیکنڈوں کے بعد بائیڈن زیادہ طویل کلپ میں ظاہر ہوئے اور وہ بینیٹ کو جواب دے رہے ہیں۔

اتوار کے روز فیس بک پر جاری وڈیو میں پس منظر میں کوئی یہ سوال کر رہا ہے کہ "کیا آپ جانتے ہیں کہ بینیٹ نے بائیڈن سے ملاقات کی ہے"۔ اس پر نیتن یاہو نے جواب دیا کہ "میں نے اس بارے میں سنا ہے۔ میں نے سنا ہے کہ بائیڈن اس ملاقات میں نہایت چوکنا تھے ،،، اس حد تک کہ (بینیٹ نے جو کچھ کہا اس پر) آمادگی کی شدت سے بائیڈن پر نیند کا غلبہ ہو گیا"۔

متعدد اسرائیلی نیوز ویب سائٹس نے نیتن یاہو پر بائیڈن کا تمسخر اڑانے کا الزام عائد کیا ہے۔