فلپائن: کیا دوتیرتے کی پارٹی سابق باکسر کی وجہ سے خطرے میں ہے؟

فلپائن کے باکسنگ اسٹار اور سینیٹر مینی پاکائو نے اعلان کیا ہے کہ وہ 2022 کے صدارتی انتخابات میں حصہ لیں گے۔

سینیٹر پاکائو نے اپنی جماعت PDP-Laban کے علاحدہ دھڑے کے قومی کنوینشن کے دوران صدارتی امیدوار کی نامزدگی قبول کی۔ان کا کہنا تھا کہ فلپائنی عوام حکومت کے تبدیل ہونے کے منتظر ہیں۔

تقریر کے دوران 42 سالہ مینی پاکائو کا کہنا تھا کہ "میں ایک جنگجو ہوں اور میں رنگ کے اندر اور باہر ہمیشہ جنگجو کی حیثیت سے رہونگا۔ میں تہہ دل، بہادری اور انکساری سے آپ سے حمایت کی امید کرتا ہوں۔"

مینی پاکائو کا مقابلہ موجودہ صدر رودریگو دوتیرتے کی جماعت سے ہوگا جس میں دوتیرتے کو نائب صدر اور ان کے سابق معاون سینیٹر بونگ گو صدارتی امیدوار نامزد کیا گیا ہے۔فلپائنی آئین کسی صدر کو دوسری بار انتخابات کے لئے نامزدگی کی اجازت نہیں دیتا ہے۔ سینیٹربونگ گو نے صدر کی نامزدگی قبول نہیں کی ہے۔

مینی پاکائو نے دوتیرتے کی حکومت پرالزام لگایا ہے کہ ان کے دور میں کرپشن مزید بد تر ہوگئی ہے۔

رودریگو دوتیرتے نے اپنے دور حکومت انسداد منشیات کی جارحانہ مہم چلائی ہے جس پر عالمی فوجداری عدالت میں ان کے خلاف تحقیقات کا اعلان کیا گیا ہے۔