ایران کے سرکاری ٹی وی نے بدھ کے روز خبردی ہے کہ سپاہِ پاسداران انقلاب نے امریکا کی بحیرۂ عمان میں ایرانی تیل’’چوری‘‘کرنے کی کوشش ناکام بنا دی ہے اور کہا ہے کہ یہ واقعہ حال ہی میں پیش آیا ہے۔
بحرین میں موجودامریکی بحریہ کے پانچویں بیڑے نے کہا ہے کہ اس نے واقعے کی اطلاعات ملاحظہ کی ہیں لیکن فی الحال اس کے پاس فراہم کرنے کے لیے کوئی معلومات نہیں ہیں۔
ایران کے سرکاری ٹی وی نے بتایا کہ امریکی فورسز نے بحیرۂ عمان میں ایرانی آئل ٹینکرکو روکنے کی کوشش کی تھی اوراس مقصد کے لیے ہیلی کاپٹراورجنگی طیاروں کا استعمال کیاہے۔ ایران کے انگریزی زبان میں نشریات پیش کرنے والے پریس ٹی وی نے بتایا ہےکہ آئیل ٹینکر ایران کی سمندری حدود میں واپس آ گیا ہے۔
ایران نے خلیج میں اپنی فوجی سرگرمیوں کے بارے میں امریکاکو باربارمتنبہ کیا ہے اورکہا ہے کہ پاسداران انقلاب کی بحری افواج نے ایرانی بحری جہازوں کی گذرگاہ کومحفوظ بنانے اورایندھن کی اسمگلنگ کی روک تھام کے لیے گشت میں اضافہ کردیا ہے۔
