پوتین سرطان کے مریض ہیں، ٹرننگ پوائنٹ اگست میں آئے گا: یوکرینی انٹیلی جنس

یوکرین میں روسی فوج کے آپریشن کا آج 80 واں روز ہے۔ یوکرین کی ملٹری انٹیلی جنس کے سربراہ کیریلو بودانوف نے غالب گمان ظاہر کیا ہے کہ 2022ء کے اختتام تک لڑائی کی تمام کارروائیاں رک جائیں گی۔

آج ہفتے کے روز برطانوی ٹی وی "اسکائی نیوز" سے گفتگو میں ان کا کہنا تھا کہ روس کے ساتھ تنازع کا ٹرننگ پوائنٹ آئندہ اگست میں سامنے آئے گا۔ بودانوف کے مطابق ٹرننگ پوائنٹ کے نتیجے میں روسی قیادت میں تبدیلی واقع ہو گی۔

یوکرینی ذمے دار نے دعوی کیا کہ روسی صدر ولادی میر پوتین کی نفسیاتی اور جسمانی حالت نہایت خراب ہے اور وہ سرطان کے مرض میں مبتلا ہیں۔ بودانوف کے مطابق ماسکو میں روسی صدر کا تختہ الٹنے کے لیے بغاوت کی کوشش کی جا چکی ہے۔

البتہ پوتین کی صحت کے حوالے سے بودانوف کے بیان کی کسی سرکاری موقف سے تصدیق نہیں ہوئی۔

یوکرین کی ملٹری انٹیلی جنس کے سربراہ نے اپنے ملک کے مستقبل کے حوالے سے نیگ گمان کا اظہار کرتے ہوئے کہا کہ روس کو اس جنگ میں بھاری نقصانات کا سامنا کرنا پڑا ہے۔

بودانوف نے زور دے کر کہا کہ یوکرین کی افواج اپنے ہاتھ سے نکل جانے والی یا روسی فوج کے قبضے میں آنے والی تمام اراضی واپس لے گی۔ ان میں دونباس اور جزیرہ نما قرم شامل ہے۔

واضح رہے کہ یوکرین کے صدر ولودی میر زیلنسکی نے جمعے کی شب جاری بیان میں کہا تھا کہ اس وقت کوئی بھی یہ خبر نہیں دے سکتا کہ "جنگ" کا اختتام کب ہو گا!