سعودی عرب سمیت جی سی سی ملکوں کے شہری جلد ہی بغیر ویزہ یورپ جا سکیں گے

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

یورپی یونین خلیج تعاون کونسل [جی سی سی] میں شامل رکن ملکوں کے تمام شہریوں کو ویزے کی پابندی سے استثنیٰ دینے کا قانون بنانے جا رہی ہے۔ اس امر کا اظہار سعودی عرب میں متعین یورپی یونین کے سفیر پیٹرک سیمونے نے کیا ہے۔

پیٹرک سیمونے کے مطابق سعودی شہریوں کے لیے ویزے کا نیا قانون بنایا گیا ہے جو جلد نافذ العمل ہو گا۔ انہوں نے بتایا کہ سعودی شہری ویزے کی پابندی کے بغیر کسی بھی یورپی ملک کا دورہ کر سکیں گے۔ یورپی یونین کے سفیر نے کہا کہ یہ اقدام خلیجی ممالک کے ساتھ یورپی یونین کی اسٹراٹیجک شراکت سے متعلق جاری اعلامیے روح کے عین مطابق ہے۔

یورپی یونین کے سفیر نے کہا کہ ویزوں سے استثنیٰ یورپی یونین اور سعودی عرب کے درمیان ہر سطح پر تعاون بڑھانے میں مدد گار ثابت ہو گا۔ سیاحت، تعلیم، تجارت اور سماجی تعلقات آزادانہ طریقے سے قائم کر سکیں گے۔

ان کا مزید کہنا تھا کہ ہمیں سعودی عرب اور یورپی یونین میں شامل ممالک کے شہریوں کو قریب لانے، ثقافتی رشتے استوار کرنے، اقدار اور طرز زندگی کے بارے میں افہام و تفہیم پیدا کرنے کی خاطر کام کرنا ہو گا۔ یہ کام اسی وقت ممکن ہے جب یورپی ممالک کے شہری زیادہ سے زیادہ تعداد میں سعودی عرب آئیں اور سعودی شہری یورپی ممالک کا سفر کریں۔

یورپی عہدیدار نے یورپی سیاحوں کو مملکت کی سیاحت کی اجازت دینے کے حوالے سے کہا کہ مملکت نے پہلی بار یورپی شہریوں کے لیے سیاحت کے دروازے کھول کر قابل قدر اقدام کیا ہے۔ انہوں نے کہا کہ یورپی ممالک ماضی میں بھی سعودی سیاحوں کی پذیرائی کرتے تھے اور آئندہ بھی کرتے رہیں گے۔

انہوں نے اس یقین کا اظہار کیا کہ سعودی شہریوں کے لیے ویزوں کا نیا قانون جلد جاری ہو گا۔ انہوں نے کہا کہ یورپی یونین میں شامل ممالک سعودی عرب کے دوسرے بڑے تجارتی شریک ہیں۔ جی سی سی ممالک کے تمام شہریوں کو ویزے سے استثنیٰ دینے کے قانون پر کام کررہے ہیں۔

یاد رہے کہ اس سے قبل برطانوی ہوم آفس نے ایک بیان میں کہا تھا کہ برطانیہ نے سعودی عرب اور بحرین کے شہریوں کو الیکٹرانک ویزے سے استثنیٰ کا درجہ دیا ہے۔ یہ درجہ یکم جون سے نافذ العمل ہو گا اور اس نئی ترمیم کے تحت سعودی عرب اور بحرین کے تمام شہری الیکٹرانک ویزے سے استثنی کے ساتھ چھ ماہ تک برطانیہ جانے کے لیے درخواست دے سکتے ہیں۔ یکم جون سے سعودی پاسپورٹ رکھنے والوں کو چوبیس گھنٹے کے اندر37 ڈالر( 30 پونڈ) میں الیکٹرانک ویزے سے استثنی مل سکتا ہے۔

مقبول خبریں اہم خبریں

مقبول خبریں