مشرقی ریجن میں پولیس نے عوامی مقام پر لوگوں کو پریشان کرنے کے الزام میں 17 افراد کو حراست میں لے لیا ہے۔ ملزمان میں 14 سعودی شہری اور 3 غیر ملکی شامل ہیں۔
سعودی خبر رساں ایجنسی ’ایس پی اے‘ کے مطابق مشرقی ریجن کی کمشنری حفر الباطن میں پولیس کو اطلاع ملی تھی کہ علاقے کی تفریح گاہ میں چند افراد راہگیروں کو پریشان کر رہے ہیں جس کے سبب سڑک پر ٹریفک کی روانی بھی متاتر ہو رہی ہے۔
اطلاع ملتے ہی پولیس کے متعدد یونٹس جائے وقوعہ پرپہنچ گئے۔ ملزمان نے گرفتاری سے بچنے کےلیے پولیس گاڑیوں کو بھی نقصان پہنچانے کی کوشش کی۔
پولیس اہلکاروں نے تمام افراد کو حراست میں لے لیا۔ ملزمان کے خلاف ابتدائی رپورٹ درج کر کے انہیں ادارہ پراسیکیوشن کے حوالے کر دیا گیا ہے جہاں ان کے خلاف تحقیقات مکمل کرنے کے بعد کیس عدالت میں پیش کیا جائے گا۔
