.

شام سرحدی جھڑپوں میں حزب اللہ کے جنگجو ہلاک؛ جیش الحر

ہرمل کے البتول ہسپتال میں دو لاشیں لائی گئیں

پہلی اشاعت: آخری اپ ڈیٹ:
شامی اپوزیشن پر مشتمل جیش الحر کا کہنا ہے کہ حزب اللہ کے دو جنگجوؤں کی لاشیں الھرمل کے البتول ہسپتال لائی گئیں ہیں۔

دوسری جانب شامی فوج اور حزب اللہ سرحدی علاقے جوسیۃ کا محاصرہ جاری رکھے ہوئے ہیں۔ سرکاری فوج اور حزب اللہ کے مشترکہ یونٹ نے علاقے کا کنٹرول سنبھال رکھا ہے اور وہ اہل علاقہ کو محفوظ مقامات کی طرف جانے سے روک رہے ہیں۔ شام کی سرحدی میونسپلٹی میں جھڑپیں جاری ہیں۔

یہ محاصرا میونسپلٹی پر تین حملوں کے بعد ممکن ہوا ہے۔ ان حملوں میں جیش الحر اور حزب اللہ کے جنگجو بڑی تعداد میں مارے گئے ہیں۔

درایں اثنا میڈیا سینٹر نے شام میں سات افراد کی ہلاکت کی تصدیق کرتے ہوئے بتایا ہے دمشق کے مختلف علاقوں پر شدید گولا باری کا سلسلہ جاری ہے۔ ہلاکتوں کی بڑی تعداد عربین شہر میں ہوئی ہے۔

دمشق کے مضافاتی علاقے الحموریہ پر بمباری میں بھی متعدد افراد کے زخمی ہونے کی اطلاعات ہیں۔ شامی سینٹر نے درعا کے اللجاہ ایریا پر بھی سرکاری فوج کی گولا باری کی اطلاع دی ہے۔

حلب شہر میں المشارقہ کے علاقے میں میونسپلٹی پیلس کے قریب جھڑپوں کی اطلاع موصول ہوئی ہے جبکہ سرکاری فوج نے خان العسل پر گولا باری جاری رکھی۔