.

سیز فائر کے چند گھنٹے بعد دمشق سرکاری فوج کی بمباری سے لرز اٹھا

'جنگ بندی میں ہونے والی جارحیت پر خاموش نہیں رہیں گے'

پہلی اشاعت: آخری اپ ڈیٹ:
شام میں حکومت اور باغیوں کے درمیان عید الاضحیٰ کے موقع پر عارضی فائر بندی کے اعلان کے باوجود ملک بھر میں کشیدگی برقرار ہے۔ عینی شاہدین کا کہنا ہے کہ فریقین میں جنگ بندی معاہدے کے چند گھنٹے بعد اسد نواز فوج نے دمشق کی جنوبی کالونی پر بمباری کی۔



مقامی شہریوں نے 'العربیہ' کو بتایا کہ سرکاری فوج کے داغے گئے گولے اسرائیل کے زیر نگیں وادی گولان سے ملحقہ حجر اسود کالونی میں گرے ہیں۔ دوسری جانب دارالحکومت دمشق میں انقلابی کارکنوں نے بھی عندیہ ظاہر کیا ہے کہ سرکاری فوج کی جارحیت کے جواب میں وہ خاموش تماشائی نہیں رہیں گے۔ ان کا کہنا تھا کہ بشار الاسد کے وفادار فوجیوں نے جنگ بندی معاہدے کی خلاف ورزی کی تو جیش الحر بھی اس کا بھرپور جواب دے گی۔

خیال رہے کہ جمعرات کے روز جب سرکاری فوج اور باغیوں کے درمیان جنگ بندی معاہدہ طے پا رہا تھا تو عین اسی وقت حلب شہر کی اشرفیہ کالونی میں سرکاری فوج کی گولہ باری سے دس افراد کی ہلاکت کی خبریں آ رہی تھیں۔

باغی جنگجوؤں کا قبضہ مستحکم

درایں اثناء محاذ جنگ سے موصولہ اطلاعات کے مطابق شام کے شمال مغربی شہر حلب میں باغیوں نے تین ماہ کی لڑائی کے بعد کرد اکثریتی الاشرفیہ کالونی کے ایک حصے کا کنٹرول حاصل کر لیا ہے اور وہاں سے سرکاری فوج کو مار بھگایا ہے۔ یہ امر قابل ذکر ہے کہ اشرفیہ کالونی گذشتہ کئی ہفتوں سے سرکاری فوج اور باغیوں کے درمیان گھمسان کی جنگ کا مرکز رہی۔ دفاعی اعتبار سے فریقین کے لئے یہ ایک اہم مقام ہے۔

مقامی شہریوں اور انسانی حقوق کے کارکنوں کا کہنا ہے باغیوں نے اشرفیہ کالونی کے آس پاس کے علاقوں پر اپنا کنٹرول مضبوط بنانے کے بعد جمعرات کے روز کالونی کے شمالی حصے پر حملہ کر کے سرکاری فوج کو وہاں سے نکال باہر کیا۔ رواں سال جولائی تک اشرفیہ کالونی ایک پرامن علاقہ تھا لیکن گرد و پیش سے متاثرہ شہریوں کی بڑی تعداد کے یہاں پناہ گزین ہونے کے بعد سرکاری فوج نے اس کالونی کو بھی میدان جنگ بنا لیا۔ اشرفیہ کالونی پر سرکاری فوج کی گولہ باری سے درجنوں شہری مارے جا چکے ہیں۔

ایک مقامی شہری کے مطابق انہوں نے سروں پر کلمہ طیبہ والے چرپم لپیٹے اور سیاہ کپڑوں میں ملبوس تقریباً پچاس افراد کو کالونی میں اس وقت داخل ہوتے جب سرکاری فوج وہاں سے پسپا ہو رہی تھی۔ جنگجوؤں نے کالونی کے شمالی حصے پر کنٹرول کے بعد گھروں کی چھتوں پر چڑھ کر اعلان کیا کہ وہ ان کے ساتھ عید منانے آئے ہیں۔