.

فلسطینی مزاحمت کاروں کے راکٹ پہلی مرتبہ القدس میں گرے

اسرائیلی جارحیت میں 24 فلسطینی شہید اور 250 زخمی

پہلی اشاعت: آخری اپ ڈیٹ:
اسلامی تحریک مزاحمت [حماس] کے عسکری ونگ نے غزہ سے 75 کلومیٹر دور القدس میں ہنگامی سائرن کے بجتے ہی مقبوضہ علاقے پر میزائل داغے ہیں۔ العربیہ کی نمائندہ ریما مصطفی کے مطابق تین میزائل مشرقی بیت المقدس اور اس کے شمال میں گرے۔ ایک میزائل جبل الخلیل پر گرا۔ اسرائیلی حکام نے اس حملے میں کسی جانی و مالی نقصان کی تصدیق نہیں کی۔

فلسطینی میڈیکل ذرائع نے غزہ پر اسرائیلی حملوں میں تیزی کے بعد شہادتوں میں اضافے کی تصدیق کی ہے۔ ابتک 24 فلسطینی شہید اور 250 زخمی ہوئے ہیں۔ جمعہ کے روز اسرائیلی جارحیت میں ایک خاتون سمیت پانچ فلسطینی بچے شہید ہوئے۔

جمعہ ہی کے روز اسرائیلی فضائیہ کی غزہ کے جنوبی علاقے خانیونس پر بمباری میں ایک فلسطینی شہری شہید ہوا۔ حماس حکومت کی وزارت صحت کی ایمبولینس اور ایمرجنسی کمیٹی نے خانیونس پر ہونے والی بمباری میں اسماعیل قندیل نامی شہری کی شہادت کی تصدیق کی ہے۔ شمالی غزہ کی پٹی میں اسرائیلی فضائیہ نے مختلف اہداف کو نشانہ بنایا جن میں چار فلسطینی زخمی ہوئے۔

حماس نے جمعہ کے روز مصری وزیر اعظم ھشام قندیل کے دورے کے موقع پر اسرائیل کی شمالی غزہ پر ہونے والی بمباری میں دو شہریوں کی شہادت کی تصدیق کی تھی، تاہم اسرائیل نے علاقے میں بمباری کی خبروں سے لاتعلقی کا اعلان کیا ہے۔