.

مصر میں ''فوجی انقلاب'' کی تیاریاں، مرسی پر سفری پابندی عاید

صدر محمد مرسی، محمد بدیع اور خیرت الشاطر کو بیرون ملک جانے سے روک دیا گیا

پہلی اشاعت: آخری اپ ڈیٹ:

مصر کے صدر محمد مرسی کے ایک مشیر کا کہنا ہے کہ ملک میں اس وقت فوجی بغاوت کی تیاریاں کی جا رہی ہیں لیکن یہ خونریزی کے بغیر کامیاب نہیں ہوگا جبکہ صدر کے علاوہ اخوان کی قیادت پر بیرون ملک جانے پر پابندی عاید کر دی گئی ہے۔

اس بے نامی مشیر نے برطانوی خبررساں ادارے رائیٹرز سے گفتگو کرتے ہوئے کہا کہ فوج اور پولیس صدر مرسی کے حامی مظاہرین کو ہٹانے کے لیے تشدد کا استعمال کرسکتے ہیں۔

اے ایف پی نے اطلاع دی ہے کہ مصری سکیورٹی فورسز نے صدر محمد مرسی اور ان کی اتحادی اسلامی جماعتوں کی قیادت پر بیرون ملک سفرکی پابندی عاید کردی ہے۔ان پر یہ پابندی جنوری 2011ء میں سابق صدر حسنی مبارک کے خلاف عوامی احتجاجی تحریک کے دوران ایک جیل کو توڑنے کے الزام میں عاید کی گئی ہے۔

قاہرہ کے ہوائی اڈے کے حکام نے اس بات کی تصدیق کی ہے کہ انھیں صدر محمد مرسی کے علاوہ اخوان المسلمون کے سربراہ محمد بدیع اوران کے نائب خیرت الشاطر کو بیرون ملک روانہ ہونے سے روکنے کے احکامات موصول ہوگئے ہیں۔