.

شام سے اسلحہ کی سمگلنگ اردنی سرحد پر ناکام

پانچ سمگلر گرفتار، ایک سال میں اسلحہ سمگلنگ میں 300 فیصد اضافہ

پہلی اشاعت: آخری اپ ڈیٹ:

اردنی سکیورٹی حکام نے پیر کے روز شامی سرحد کی طرف سے اسلحہ سمگل کرنے کی کوشش ناکام بناتے ہوئے پانچ افراد کو گرفتار کر لیا اور بھاری اسلحہ قبضے میں لے لیا ہے۔ فوج کے ترجمان کے مطابق یہ واقعہ پیر کو علی الصبح پیش آیا ہے۔

تفصیلات کے مطابق بھاری مقدار میں شامی علاقے سے اسلحہ اردن میں سمگل کرنے کی کوشش کی جارہی تھی کہ اردن سرحدی حفاظت پر مامور فوجی اہلکاروں نے اسلحہ سمگلروں کو پکڑ لیا۔

یہ اسلحہ ایک گاڑی پر لاد کر لایا جا رہا تھا۔ اردنی سرحدی محاظین نے گاڑی سمیت اسلحہ قبضے میں لے لیا جبکہ پانچ افراد کو گرفتار کر لیا۔

واضح رہے اردن کے حکام کا کہنا ہے کہ پچھلے سال کے مقابلے میں شام سے اسلحہ کی سمگلنگ میں 300 فیصد اضافہ ہو چکا ہے۔ اب تک اس نوعیت کی سینکڑوں کوششیں ناکام بنائی جاچکی ہیں۔

جب سے شام خانہ جنگی کا شکار ہے تقریبا پانچ لاکھ شامی شہری اپنے ہمسائے ملک اردن میں پناہ گزین ہو چکے ہیں۔