.

الجزائر : درسی کتب سے "بسملہ" حذف کیے جانے پر تنقید کا طوفان

پہلی اشاعت: آخری اپ ڈیٹ:

الجزائر کے آزاد ہونے کے بعد ملک میں پہلی مرتبہ رواں سال تعلیمی نصاب کی نئی کتابیں بسملہ یعنی "بسم الله الرحمن الرحيم" کی عبارت سے خالی ہیں۔ اس اقدام نے ملک میں وسیع پیمانے پر تنازع برپا کر دیا ہے بالخصوص دو روز قبل مسلم علماء ایسوسی ایشن کی جانب سے وزارت تعلیم کے اس فیصلے کی مذمت کے بعد عوام میں غم و غصے کی لہر شدید ہو گئی ہے۔

الجزائر کی وزیر تعلیم نوریہ بن غبریت نے بدھ کے روز سے شروع ہونے والے تعلیمی سال کے لیے اسکول کی کتابوں سے بسملہ کو حذف کر دیے جانے کی تصدیق کی ہے۔ انہوں نے واضح کیا کہ اسلامیات کی کتابوں میں بسملہ لازم ہونے کے سبب موجود ہے تاہم جہاں تک بقیہ درسی کتب سے اس کے حذف کرنے کا تعلق ہے تو اس کی ذمے داری کتابوں کی ڈیزائننگ اور طباعت کے نگراں حضرات پر عائد ہوتی ہے۔

الجزائر میں لوگوں کی ایک بڑی تعداد اور مذہبی اداروں نے اس فیصلے کی سخت مذمت کی ہے۔ ملک کی سب سے بڑی مذہبی انجمن مسلم علماء ایسوسی ایشن نے اس فیصلے کو "بچوں کے ذہنوں اور قوم کی شناخت پر حملہ اور الجزائر کے عوام کی شخصیت اور ان کے عقیدے کو نقصان پہنچانے والا قرار دیا"۔

ایسوسی ایشن کے مطابق چار دہائیوں سے ملک کے صدر کی تقریروں اور تمام درسی تالیفات کی ابتدا بسم اللہ الرحمن الرحیم سے ہو رہی ہے۔ انجمن نے حکام پر الزام عائد کیا کہ وہ بچوں کو غیر مذہبی اقدار پر پروان چڑھانے کے لیے کوشاں ہے جو ان کے اخلاق کے لیے تباہ کن ثابت ہوں گی۔ ایسوسی ایشن نے استفسار کیا کہ " بسملہ کو حذف کرنے کے اقدام کے پیچھے کیا مقصد اور ایجنڈا چھپا ہوا ہے !"۔

سوشل میڈیا پر سرگرم الجزائری حلقوں نے اس فیصلے کا مقصد تمام تعلیمی پروگراموں کو دینی مواد سے خالی کرنا اور بچوں کو ان کی مذہبی شناخت سے دور کرنا ہے۔ ان حلقوں نے سرپرستوں ، والدین اور تعلیمی شعبے کے ذمے داران سے مطالبہ کیا کہ وہ پڑھائی کے آغاز سے قبل بچوں کی کتابوں میں بسملہ کا اضافہ کریں۔

اس سلسلے میں عوام کی جانب سے مختلف ردّ عمل سامنے آئے۔ ایک شہری سلیم نے ازراہِ مذاق کہا کہ "رواں سال ہمارا مطالبہ پورا کر دیا گیا ہے اور کتابوں سے بسملہ کے حذف کیا جانے سے طلبہ کے اسکولوں کے بستے ہلکے ہوگئے ہیں۔ قرآن کریم اور الجزائر کا آئین بسم الله الرحمن الرحيم سے شروع ہوتے ہیں۔ سرکاری حکام نے کیا سوچ کر بسملہ کو حذف کیا ہے جب کہ اس کے مقابل فرانسیسی زبان کی تعلیم کے لیے 3 اضافی گھنٹے شامل کر دیے گئے ہیں۔ اس روش پر چلنا ملک اور اس کے نظریات کے لیے انتہائی خطرناک ہے"۔