.

سعودی عرب کی عراق میں دوہرے بم دھماکوں کی شدید مذمت

پہلی اشاعت: آخری اپ ڈیٹ:

سعودی عرب کی وزارت خارجہ نے گذشتہ روز عراق کے شہر الناصریہ میں دہرے بم دھماکوں کی شدید مذمت کرتے ہوئے بغداد حکومت کے ساتھ مکمل یکجہتی کا اظہار کیا ہے۔

العربیہ ڈاٹ نیٹ کے مطابق سعودی وزارت خارجہ کے ذرائع کے مطابق مملکت نے جنوبی عراق کی ذی قار گورنری کے الناصریہ شہر میں ایک ہوٹل اور ایک چیک پوسٹ پر ہونےوالے بم دھماکوں کی شدید مذمت کی ہے۔

ذرائع کا کہنا ہے کہ دہشت گردی اور انتہا پسندی کے خلاف جاری جنگ میں سعودی عرب بغداد کے ساتھ ہے۔ گذشتہ روز دہشت گردوں کے تباہ کن حملوں میں ہونے والے قیمتی جانی نقصان پر سعودی عرب کو بھی گہرا دکھ اور افسوس ہے۔ سعودی عرب بم دھماکوں میں زخمی ہونے والے عراقی شہریوں کی جلد صحت یافی کا خواہاں ہے۔

خیال رہے کہ گذشتہ روز عراق میں ہونے والے تباہ کن بم دھماکوں کے نتیجے میں 74 افراد ہلاک اور 93 زخمی ہوگئے تھے۔ مرنے والوں میں سات ایرانی بھی شامل ہیں۔ شدت پسند گروپ داعش نے ان حملوں کی ذمہ داری قبول کی ہے۔