.

بحرین: قطر کے لیے مخبری کا الزام، جمعیۃ الوفاق کے سربراہ کو حتمی جیل

پہلی اشاعت: آخری اپ ڈیٹ:

بحرین میں کورٹ آف کیسیشن نے حزب اختلاف کی کالعدم جماعت جمعیۃ الوفاق کے سربراہ علی سلمان اور اس کے دو ساتھیوں کی عمر قید کی سزا کی توثیق کر دی ہے۔ تینوں افراد پر قطر کے لیے مخبری انجام دینے اور دفاعی راز حوالے کرنے کا الزام ہے۔

پیر کے روز کورٹ آف کیسیشن کی جانب سے جاری فیصلہ حتمی ہے اور اس کے خلاف اپیل نہیں کی جا سکتی۔ یاد رہے کہ جمعیۃ الوفاق کو بحرین کی عدلیہ پہلے ہی تحلیل کر چکی ہے۔

بحرین کی ایک عدالت نے گزشتہ برس جون میں علی سلمان اور اس کے دو ساتھیوں کو مذکورہ الزامات سے بری کر دیا تھا جس کے بعد استغاثہ نے اس مقدمے کا دوبارہ آغاز کیا۔

علی سلمان کو 2014 میں حراست میں لیا گیا تھا۔ وہ اس وقت اشتعال انگیزی اور وزارت داخلہ کی ہتک کے الزامات سے متعلق علاحدہ مقدمات میں چار سال قید کی سزا کاٹ رہا ہے۔

جولائی 2016 میں بحرین کی عدلیہ نے جمعیۃ الوفاق اور اسی طرح سیکولر تنظیم جمعیۃ "وعد" کو تحلیل کر دیا تھا۔