ترکی: داعش تنظیم سے تعلق کے شبہے میں 20 افراد گرفتار

پہلی اشاعت: آخری اپ ڈیٹ:
مطالعہ موڈ چلائیں
100% Font Size

ترکی میں پولیس نے جمعرات کے روز اعلان کیا ہے کہ داعش تنظیم سے تعلق کے شبہے میں استنبول شہر میں 20 کے قریب افراد کو گرفتار کر لیا گیا ہے۔ یہ گرفتاریاں نئے سال کی آمد کے موقع پر تقریبات سے قبل شدت پسندوں کے خلاف مہم کے سلسلے میں عمل میں آئی ہیں۔

ترکی پولیس نے منگل اور بدھ کے روز ملک کے سب سے بڑے شہر میں 48 مقامات پر چھاپے مارے۔ کارروائی کے نتیجے میں 20 افراد کو حراست میں لیا گیا جن کے بارے میں شبہہ ہے کہ ان کا تعلق شدت پسند تنظیم (داعش) سے ہے۔

سال 2017 میں 31 دسمبر کی رات استنبول کے ایک نائٹ کلب میں دہشت گرد حملہ کیا گیا تھا جس کے نتیجے میں 39 افراد ہلاک ہو گئے۔ داعش تنظیم نے اس کارروائی کی ذمے داری قبول کی تھی۔

رواں سال اکتوبر سے ترکی نے شمالی شام میں اپنے فوجی حملے کے بعد داعش تنظیم کے مسلح افراد کو ان کے حقیقی وطنوں کو واپس لوٹانے کے لیے اپنی کوششیں تیز کر دی ہیں۔

انقرہ حکومت نے مغربی ممالک پر کڑی نکتہ چینی کی ہے کہ انہوں نے شام اور عراق میں داعش تنظیم کی صفوں میں لڑنے والے اپنے جنگجوؤں کو واپس لینے سے انکار کر دیا۔ ترکی ان ممالک سے بارہا مطالبہ کر چکا ہے کہ وہ اس حوالے سے اپنی ذمے داریاں پوری کریں۔

مقبول خبریں اہم خبریں