.

امریکا کے خلاف عراقی رد عمل ایران کے جواب سے کم نہ ہو گا: قیس الخزعلی

پہلی اشاعت: آخری اپ ڈیٹ:

عراق میں ایران نواز ملیشیا الحشد الشعبی میں شامل ایک شیعہ گروپ "عصائب اہل الحق" کے سربراہ قیس الخزعلی کا کہنا ہے کہ القدس فورس کے سربراہ قاسم سلیمانی کی امریکا کے ہاتھوں ہلاکت کا اولین جواب ایران نے دے دیا اور اب عراقی جواب کا وقت آ گیا ہے۔

بدھ کے روز اپنی ٹویٹ میں الخزعلی نے کہا کہ عراق کا جواب بھی ایران سے کم ہر گز نہ ہو گا۔

امریکا قیس الخزعلی کی تنظیم کو ایک دہشت گرد جماعت قرار دے چکا ہے۔

الخزعلی کے مطابق چوں کہ عراق کے لوگ شجاعت اور غیرت کے حامل ہوتے ہیں لہذا ان کا جواب بھی حجم میں ایرانی رد عمل سے کم نہ ہو گا۔

ادھر الحشد الشعبی کے ایک اور گروپ "حركۃ النجباء" نے جس کی قیادت اکرم العکبی کے پاس ہے ،،، ایک ٹویٹ میں ایران کا شکریہ ادا کرتے ہوئے امریکی فوج کے خلاف انتقام لینے اور لڑائی کا سلسلہ جاری رکھنے کی دھمکی دی ہے۔

ایران نے بدھ کو علی الصبح عراق میں دو فوجی اڈوں کو بیسلٹک میزائلوں کے ذریعے حملوں کا نشانہ بنایا۔ یہ کارروائی جمعے کے روز بغداد میں امریکی ڈرون طیاروں کے حملے کے جواب میں کی گئی۔ امریکی حملے میں ایرانی پاسداران انقلاب کی القدس فورس کا سربراہ قاسم سلیمانی اور عراقی ملیشیا الحشد الشعبی کا نائب سربراہ ابو مہدی المہندس مارا گیا تھا۔ ان کے ہمراہ بعض ایرانی سینئر افسران اور الحشد الشعبی کے ذمے داران بھی ہلاک ہوئے۔