پاسداران انقلاب کے سربراہ کی امریکا اور اسرائیل کو دھمکی

ایران کی سپاہ پاسداران انقلاب کے سربراہ جنرل حسین سلامی نے امریکا اور اسرائیل کو ایک بار پھر سنگین نتائج کی دھمکی دی ہے۔

جنرل حسین سلامی نے خبردار کیا ہے کہ اگر امریکا نے ایران کے سینیر جرنیلوں کو نقصان پہنچانے کی کوشش کی تو اس کا بدلہ امریکی اور اسرائیلی لیڈروں کی ہلاکت سے لیا جائے گا۔

ایران کے سرکاری ٹی وی چینل پر نشر ایک بیان میں جنرل سلامی نے کہا کہ 'میں امریکیوں کو مشورہ دیتا ہوں کہ وہ میدان سے نکل جائیں، میں بتا دینا چاہتا ہوں کہ اگر امریکیوں نے میرے مشورے پر عمل نہ کیا تو انہیں پچھتانا پڑے گا'۔

خیال رہے کہ تین جنوری کو امریکا نے بغداد میں ایک ڈرون حملے میں ایران کی فیلق القدس کے کمانڈر جنرل قاسم سلیمانی کو ہلاک کردیا تھا۔ اس آپریشن میں عراق کی الحشد ملیشیا کے نائب ابو مہدی المہندس اور دیگر شدت پسند بھی شامل تھے۔

اس واقعے کے پانچ روز بعد ایران نے عراق میں موجود امریکا کے دو فوجی اڈوں پر میزائل حملے کیے تاہم ان حملوں میں کوئی امریکی ہلاک نہیں ہوا تاہم متعدد کے زخمی ہونے کی اطلاعات ہیں۔

جنرل قاسم سلیمانی مشرق وسطیٰ میں ایران کے ایک ایجنٹے کے طورپر کام کررہا تھا جس نے خطے میں امریکی مفادات پر حملوں کی منصوبہ بندی کر رکھی تھی۔