لبنانی وزیراعظم اورکابینہ کے ارکان کا آیندہ پارلیمانی انتخابات میں حصہ نہ لینے کا عزم
لبنان کے وزیراعظم حسان دیاب اور ان کی کابینہ میں شامل اٹھارہ وزراء نے ملک میں ہونے والے آیندہ پارلیمانی انتخابات میں حصہ نہ لینے کے عزم کا اظہار کیا ہے اور کہا ہے کہ وہ کسی بھی امیدوار کی کسی بھی طرح سے حمایت بھی نہیں کریں گے۔
لبنان کی پارلیمان نے دو روز قبل ہی وزیراعظم حسان دیاب کے زیر قیادت نئی کابینہ کی منظوری دی ہے۔اس نئی کابینہ میں چھے خواتین وزراء سمیت بیشتر نئے چہرے شامل ہیں اور بعض ٹیکنوکریٹ ہیں۔
لبنانی آئین کے مطابق آیندہ پارلیمانی انتخابات 2022ء میں ہوں گے۔لبنان میں گذشتہ پارلیمانی انتخابات 2018ء میں نو سال کے وقفے کے بعد ہوئے تھے۔
لبنان میں اکتوبر سے سیاسی اشرافیہ کی بدعنوانیوں اور معیشت کی زبوںحالی کے خلاف پُرامن احتجاجی تحریک جاری ہے۔احتجاجی مظاہرین موجود پارلیمان کو چلتا کرنے اور اس کی جگہ قبل ازوقت پارلیمانی انتخابات کرانے کا مطالبہ کررہے ہیں لیکن ابھی تک نئے انتخابات کے انعقاد کے لیے کوئی تاریخ مقرر نہیں کی گئی ہے۔
گذشتہ ہفتے پارلیمان نے ایک پالیسی بیان کی منظوری دی تھی۔اس میں یہ کہا گیا تھا کہ وہ نئے انتخابات کی تیاری کرے گی۔ان کے انعقاد کے لیے قانون کی منظوری پارلیمان ہی دے گی۔اس وجہ سے اس کی شفافیت کے حوالے سے سوال اٹھائے جارہے ہیں۔
