سعودی عرب کے دارالحکومت الریاض میں قائم امریکی سفارت خانے کی طرف سے گذشتہ روز حوثی ملیشیا کے سعودی عرب پر کیے گئے بیلسٹک میزائل حملوں کی شدید مذمت کی ہے۔
العربیہ ڈاٹ نیٹ کے مطابق سعودی عرب میں متعین امریکی سفیر جان ابی زید نے مائیکرو بلاگنگ ویب سائیٹ 'ٹویٹر' پر پوسٹ کردہ ایک ٹویٹ میں حوثیوں کے سعودی عرب پرحملے کی شدید الفاظ میں مذمت کی۔ ان کا کہنا تھا کہ حوثی ملیشیا کا سعودی عرب میں شہری آباد کو بیلسٹک میزائلوں سے نشانہ بنانا سنگین جرم اور قابل مذمت اقدام ہے۔
السفير الأمريكي جون #أبي_زيد: "تدين البعثة الأمريكية بشدة الهجمات التي نفذها الحوثيون ضد أهداف مدنية في المملكة العربية السعودية الليلة الماضية. pic.twitter.com/QDvYUR2aAM
— U.S. Mission to KSA (@USAinKSA) March 29, 2020
انہوں نے مزید کہا کہ دنیا کرونا کی وبا سے لڑنے اور جانیں بچانے کے لیے کوشاں ہے اور ایرانی حمایت یافتہ حوثی ملیشیا یمن اور سعودی عرب میں بے گناہ شہریوں پر حملہ کرکے ایرانی پاسداران انقلاب کی قدس فورس کے مشن کو آگے بڑھا رہی ہے۔
جان ابی زید کا کہنا تھا کہ ہم سعودی عرب میں حوثیوں کے میزائل حملوں کی شدید مذمت کرتے ہوئے امید کرتے ہیں ان حملوں میں زخمی ہونے والے سعودی شہری جلد صحت یاب ہوں گے۔
خیال رہے کہ کل اتوار کو عرب اتحادی فوج نے حوثی ملیشیا کی طرف سے سعودی عرب کے شہروں الریاض اور جازان کی طرف داغے گئے بیلسٹک میزائل تباہ کردیے تھے۔ فضاء میں تباہ کیے گئے میزائلوں کے شیل لگنے سے متعدد شہری زخمی ہوگئے تھے۔