سعودی فرماں روا شاہ سلمان بن عبدالعزیز نے رواں سال روزے داروں کے افطار کے منصوبے کے لیے مختص مالی رقم میں اضافے کی منظوری دے دی۔ یہ منظوری منگل کی شام منعقد ہونے والے کابینہ کے اجلاس میں سامنے آئی۔ سعودی عرب کی وزارت اسلامی امور اور دعوت و ارشاد دنیا کے 18 ممالک میں اس منصوبے پر عمل درامد کر رہی ہے۔ اس کے تحت دس لاکھ افراد کو روزہ افطار کرانے کا ہدف مقرر کیا گیا ہے۔
علاوہ ازیں سعودی کابینہ نے یمن میں آئینی حکومت کو سپورٹ کرنے والے اتحاد کے اعلان کردہ موقف پر زور دیا ہے۔ اعلان میں کہا گیا تھا کہ عدن اور بعض جنوبی صوبوں میں حالات اُسی نقطے پر واپس لائے جائیں جو عبوری کونسل کی جانب سے ایمرجنسی کے اعلان سے قبل تھے۔ ساتھ ہی ایسے کسی بھی اقدام کو منسوخ کیا جائے جو ریاض معاہدے کی مخالفت کرتا ہو۔ مذکورہ معاہدے کا بین الاقوامی سطح پر وسیع خیر مقدم کیا گیا اور اسے اقوام متحدہ کی براہ راست حمایت حاصل ہے۔ اس موقع پر معاہدے پر عمل درامد میں جلدی کا بھی مطالبہ کیا گیا۔
کابینہ کے اجلاس میں عرب اتحاد کی جانب سے فائر بندی میں ایک ماہ کی توسیع کے فیصلے کو بھی سراہا گیا۔ اس توسیع کا مقصد یمن میں کرونا وائرس کی وبا کا مقابلہ کرنا ہے تا کہ رمضان کے مہینے میں یمنی عوام کے دکھوں اور مسائل میں کمی لائی جا سکے۔ ساتھ ہی ایک جامع سیاسی حل تک پہنچنے کے لیے اقوام متحدہ کی کوششوں کو سپورٹ کیا جائے جو یمن کی سلامتی، امن اور وحدت کی حفاظت کرے۔
