سعودی عرب میں آگ برساتے سورج کے نیچے گاڑی میں پھنسے دو بچوں کا کیا ہوا ؟

سعودی عرب کے شمال میں ایک شخص نے گاڑی میں پھنسے دو بچوں کو بچا لیا جو شدید گرمی میں زار و قطار رو رہے تھے۔

مذکورہ شخص نے اس کارروائی کا وڈیو کلپ بھی بنا لیا جو سوشل میڈیا پر وائرل ہو گیا۔

اس حوالے سے سماجی بہبود کی وزارت کے سرکاری ترجمان ناصر الہزانی نے العربیہ ڈاٹ نیٹ کو دیے گئے بیان میں بتایا کہ شمالی سرحد کے صوبے میں سیکورٹی یونٹ نے مذکورہ کیس کا نوٹس لے لیا۔ انہوں نے مطالبہ کیا کہ کسی بھی نوعیت کے تشدد یا ایذا رسانی کے کیس کے بارے میں خاندانی تشدد کی اطلاع کے مرکز پر 1919 پر آگاہ کیا جائے۔

الہزانی کے مطابق سوشل میڈیا پر وائرل ہونے والی وڈیو میں نظر آنے والے دونوں بچوں تک پہنچنے کے لیے رابطہ کاری جاری ہے اور ذمے دار افراد کے خلاف ضابطے کی کارروائی کی جائے گی۔

واضح رہے کہ #المفقودين_جواهر_ووايل سعودی عرب میں ٹویٹر پر سرفہرست ٹرینڈ رہا۔ صارفین نے دونوں بچوں کے تحفظ کا مطالبہ کرتے ہوئے والدین کی غفلت کی مذمت کی۔