طائف شہر کو سعودی عرب میں موسم گرما میں وقت گزارنے کے لیے اہم ترین تفریحی مقامات میں شمار کیا جاتا ہے۔ اس کی وجہ ٹھنڈی اور برساتی فضاؤں کو تلاش کرنے والے سیاحوں کے لیے پر کشش ماحول ہے۔
سعودی کیمرہ مین ولید الطلحی نے طائف شہر میں پہاڑوں اور وادیوں کے بیچ نقل و حرکت کے دوران وہاں کے حسین قدرتی مناظر کو اپنے کیمرے کی آنکھ میں محفوظ کر لیا۔ بعد ازاں ان سحر انگیز تصاویر کو سوشل میڈیا پر پوسٹ کر دیا۔
الطلحی نے العربیہ ڈاٹ نیٹ کو بتایا کہ "میں نے 2015ء سے تصویر کشی اور عکس بندی کے مشغلے کا آغاز کیا۔ ابتدائی طور پر میں نے موبائل کیمرے کو استعمال کیا۔ یہاں تک کہ میں نے پروفیشنل کیمرا لے لیا اور پھر کچھ نیا کرنے کی شروعات کی۔ میں نے اپنے فوٹوگرافی کے ماہر دوستوں سے تجربہ اور معاونت حاصل کی اور قدرتی مناظر کی تصویر کشی میں مہارت حاصل کر لی۔ مجھے اس سمت کے تعین سے عشق ہو گیا جو وطن کے جمال کو دنیا تک پہنچانے میں میرا مدد گار ثابت ہو رہا ہے"۔
ولید الطلحی نے مزید بتایا کہ "میری طائف کی بنائی ہوئی متعدد تصاویر معروف جریدے نیشنل جیوگرافک (عربی) میں شائع ہو چکی ہیں۔ ان تصاویر کو سعودی عرب میں اور اس کے بیرون بہت سے لوگوں کو پسندیدگی حاصل ہوئی۔ اب میری خواہش ہے کہ ایک نمائش کا انعقاد کروں جہاں طائف کے گلاب کے حوالے سے میری کئی تصاویر رکھی جائیں ،،، تا کہ تمام لوگ طائف کے قدرتی مناظر کا مشاہدہ کر سکیں"۔
طائف شہر کو اس کی خوب صورتی ، سحر انگیز قدرتی مناظر اور معتدل آب و ہوا کے پیش نظر "پُر فضا مقامات کی دلہن" اور "گلاب کا شہر" جیسے خطابات سے نوازا گیا ہے۔
