لبنان کے دارالحکومت بیروت میں اگست کے اوائل میں ہونے والے دھماکوںکے بعد حکام نے ملبے کے نیچے سے دھماکہ خیز مواد امونیم نائٹریٹ کی مزید 4 ٹن مقدار برآمد کی ہے۔ یہ دھماکہ خیز مواد بیگوں میں ڈالا گیا تھا۔
العربیہ ڈاٹ نیٹ کے مطابق بندرگاہ میں تباہ شدہ عمارتوں کے ملبے سے ملنے والے امونیم نائٹریٹ کو ٹھکانے لگا دیا گیا ہے۔
انہوں نے ہفتے کے روز ایک بیان میں وضاحت کی کہ انجینئرنگ رجمنٹ کے یونٹوں نے فوج کے بلاسٹنگ زون میں دھماکہ سے تباہ کردی۔
جمعرات کی شام لبنانی فوج نے انکشاف کیا کہ اسے بیروت بندرگاہ کے دروازے کے قریب چار کنٹینروں کے اندر بھاری مقدار میں امونیم نائٹریٹ ملی ہے جو 4 اگست کے دھماکے سے عمارتوں کے ملبے تلے دب گیا تھا۔ چار اگست کو بیروت بندرگاہ پرہونے والے خوفناک دھماکوں کے نتیجے میں 191 افراد ہلاک اور چھ ہزار سے زاید زخمی ہوگئے تھے۔
بیروت پورٹ مینجمنٹ اینڈ انویسٹمنٹ کے ڈائریکٹر جنرل باسم القیسی نے اس سے قبل انکشاف کیا تھا کہ دھماکا خیز مواد پر مشتمل دیگر کنٹینرز بھی موجود ہیں۔ ایک مقامی چینل کو انٹرویو دیتے ہوئے انہوں نے کہاکہ ہم نے متعلقہ افراد کو تحریری طور پر بتایا ہے کہ وہ کسٹم حکام کے ساتھ مل کر مزید دھماکہ خیز مواد کی تلاش کریں۔
