دبئی کے ولی عہد اور شتر مرغوں کی دل چسپ وڈیو

دبئی کے ولی عہد شیخ حمدان بن محمد بن راشد آل مکتوم نے ایک وڈیو شیئر کی ہے جس میں وہ ایک دل چسپ صورت حال میں سائیکل چلانے کا شوق پورا کرتے نظر آ رہے ہیں۔

واضح رہے کہ تقریبا ایک ہفتہ قبل شیخ حمدان نے انسٹاگرام پر اپنے سرکاری اکاؤنٹ پر ایک تصویر پوسٹ کی تھی۔ تصویر میں ایک شتر مرغ کو سڑک پر سے گزرتے ہوئے دکھایا گیا جب کہ شیخ حمدان اپنے ساتھیوں کے ساتھ اس کے نزدیک سائیکل پر سوار تھے۔ تصویر کے ساتھ شیخ حمدان نے تحریر کیا تھا "قریب الوقوع واقعہ"۔

بعد ازاں یکم جنوری کو دبئی کے ولی عہد نے ایک وڈیو کلپ پوسٹ کیا جس میں دو شتر مرغوں کو ایک سڑک کے کنارے ریت پر تیزی سے چلتے ہوئے دکھایا گیا جب کہ اس کے مقابل سائیکل سوار سڑک پر موجود نظر آئے۔

اس وڈیو کلپ پر تبصرہ کرتے ہوئے بھی شیخ حمدان نے لکھا "آج صبح ، ایک اور قریب الوقوع واقعہ"۔

یاد رہے کہ شتر مرغ کی رفتار 100 کلو میٹر فی گھنٹہ تک پہنچ سکتی ہے۔