مسلسل مشقوں کے نتیجے میں ایرانی پاسداران انقلاب میں کرونا وبا پھیل گئی

ایران کی سپاہِ پاسداران انقلاب گذشتہ دو ہفتوں سے مسلسل مشقیں کررہی ہے۔ ان مشقوں میں پاسداران عناصر کی عسکری صلاحیت میں اضافہ ہوا ہے یا نہیں مگر ان مشقوں نے ایران کی طاقت ور فوج میں کرونا کی وبا پھیلا دی ہے۔

العربیہ ڈاٹ نیٹ کو با خبر ذرائع سے اطلاع ملی ہے کہ پاسداران انقلاب کی مشقوں کے دوران کرونا ایس وپیز پر عمل درآمد نہ کرنے اور مشقوں میں بڑی تعداد میں اہلکاروں کی سماجی فاصلے کے بغیرشرکت نے اہلکاروں میں کرونا کی وبا پھیلا دی ہے۔

ایران کی وزارت صحت کے ایک ذمہ دار ذریعے کا کہنا ہے کہ پاسداران انقلاب نے وبا پھیلنے کے بعد اضافی طبی آلات اور ادویات طلب کی ہیں۔

ذرائع کا کہنا ہے کہ جن اضلاع میں یہ مشقیں کی گئی ہیں فوجیوں میں یہ وبا انہی علاقوں سے پھیلی ہے۔ متاثر ہونے والے اہلکاروں کی تعداد اتنی زیادہ ہے کہ ملٹری اسپتالوں میں گنجائش ختم ہونے کے بعد انہیں سول اسپتالوں میں لایا جا رہا ہے۔

پاسداران انقلاب نے مختلف اضلاع کے محکمہ صحت کے حکام سے اہلکاروں کے طبی معائنے کو کہا ہے۔ ذرائع کا کہنا ہے کہ ویسے تو ایران کے کئی اضلاع میں کرونا پھیل چکا ہے مگر جنوبی اضلاع سب سے زیادہ وبا کی لپیٹ میں ہیں۔

اسی ذریعے کا کہنا ہے کہ پاسداران انقلاب میں نہ صرف مسلسل مشقوں کی وجہ سے کرونا پھیلا ہے بلکہ مذہبی اجتماعات میں اندھا دھند شرکت بھی وبا پھیلنے کا سبب بنی ہے۔ ذرائع کے مطابق حالیہ ایام میں ایران میں 'فاطمیہ ایام' کے عنوان سے مذہبی رسومات ادا کی گئیں جن میں پاسداران انقلاب، پاسیج فورس اور دیگر ملیشیائوں کے عناصر کی بڑی تعداد نے شرکت کی۔