سعودی خاتون فضائی میزبان کا اپنے عملی تجربے کے حوالے سے کیا کہنا ہے؟

ہوابازی کے سیکٹر میں کام کرنے والی ایک سعودی خاتون نے اپنے عملی تجربے کو بیان کرتے ہوئے اس میدان میں مزید مہارت حاصل کرنے کی خواہش کا اظہار کیا ہے۔

العربیہ نیوز چینل کے ایک پروگرام میں گفتگو کرتے ہوئے فضائی میزبان "سحر" نے بتایا کہ "مجھے بچپن سے ہی فضائی سفر اور ایک جگہ سے دوسری جگہ جانا پسند تھا۔ یہ شوق اور یہ لگاؤ ہی مجھے فضائی میزبان کی ملازمت میں لے آیا"۔

سحر کے مطابق ان کی ذمے داریوں میں مسافروں کی ایک مقام سے دوسرے مقام تک منتقلی کے دوران میں اعلی سطح کی خدمات پیش کرنا شامل ہے۔ ان خدمات کا تعلق مسافروں کی سلامتی، لوجسٹک سروس، مسافروں کے استفسارات کے جوابات اور طیارے میں کسی بھی ہنگامی صورت حال سے نمٹنے سے ہے۔ سحر اب تک 1500 گھنٹے فضائی سفر میں گزار چکی ہیں۔