یمن میں آئینی حکومت کے حامی عرب اتحاد نے جمعے کے روز ایک اعلان میں بتایا ہے کہ سعودی عرب کے شہر خمیس مشیط کی سمت بھیجے جانے والے ایک بارودی ڈرون طیارے کو فضا میں نشانہ بنا کر تباہ کر دیا گیا۔ یہ طیارہ ایران نواز حوثی ملیشیا کی جانب سے بھیجا گیا تھا۔
اس سے چند گھٹنے قبل حوثیوں کی جانب سے مملکت کے صوبے جازان کی سمت داغے گئے ایک بیلسٹک میزائل کو تباہ کرنے کا اعلان کیا گیا تھا۔ حوثی ملیشیا نے اس کارروائی میں منظم اور دانستہ طور پر شہریوں کو نشانہ بنانے کی کوشش کی۔
عرب اتحاد کے سرکاری ترجمان بریگیڈیئر جنرل ترکی المالکی کے مطابق دہشت گرد حوثی ملیشیا کی جانب سے شہریوں کو منظم اور دانستہ طور پر بیسلٹک میزائلوں کے ذریعے نشانہ بنانا ،،، جنگی جرائم کے مترادف کارروائی ہے۔
یاد رہے کہ عرب اتحاد کے اعلان کے مطابق اب تک حوثی ملیشیا کی جانب سے بھیجے گئے 532 ڈرون طیاروں کو فضا میں نشانہ بنا کر تباہ کر دیا گیا۔ علاوہ ازیں سعودی دفاعی نظام مملکت کی سمت داغے گئے 350 بیلسٹک میزائلوں کا راستہ روک کر انہیں گرا چکا ہے۔
