.
سعودی معیشت

کرونا کے سال سعودی عرب میں سینیما گھروں کی 66 لاکھ ٹکٹیں فروخت ہوئیں

پہلی اشاعت: آخری اپ ڈیٹ:

ایک حالیہ رپورٹ میں بتایا گیا ہے کہ سعودی عرب میں گذشتہ برس (2020ء میں) کرونا کی روک تھام کے لیے احتیاطی اقدامات نافذ کرنے اور سینیما گھروں میں بکنگ کے لیے نشستوں کی تعداد کم کرنے کے باوجود فلم بینی کے لیے 66 لاکھ ٹکٹیں فروخت ہوئیں۔

وزارت ثقافت کی جانب سے جاری رپورٹ میں "بصری اور صوتی ذرائع ابلاغ کی جنرل اتھارٹی" کی فراہم کردہ معلومات کو بنیاد بنایا گیا ہے۔ یاد رہے کہ 2019ء میں فلم بینی کے لیے فروخت ہونے والی ٹکٹوں کی تعداد تقریبا 40 لاکھ تھی۔

واضح رہے کہ 2020ء میں سعودی عرب کے مختلف شہروں میں نئے سینیما گھروں کے کھلنے کے بعد مملکت میں ان کی مجموعی تعداد 33 تک پہنچ گئی۔ سال 2019ء میں سینیما گھروں کی تعداد 19 تھی۔

گذشتہ برس فروخت ہونے والی ٹکٹوں کے لحاظ سے دارالحکومت ریاض 34 لاکھ ٹکٹوں کے ساتھ پہلے نمبر پر رہا۔ اس کے بعد جدہ 21 لاکھ ٹکٹوں کے ساتھ دوسرے ، دمام 5.43 لاکھ ٹکٹوں کے ساتھ تیسرے، ظہران 1.86 لاکھ ٹکٹوں کے ساتھ چوتھے اور ہفوف شہر 1.3 لاکھ ٹکٹوں کی فروخت کے ساتھ پانچویں نمبر پر رہا۔ اس کے بعد چھٹی پوزیشن جازان (1.28 لاکھ ٹکٹ) ، ساتویں پوزیشن جبیل (47 ہزار ٹکٹ) ، آٹھویں پوزیشن تبوک (45 ہزار ٹکٹ) اور نویں اور آخری پوزیشن ابہا (8373 ٹکٹ) نے حاصل کی۔