رمضان مبارک میں حرم مکّی کے کتب خانے کے اوقات کیا ہوں گے ؟

رمضان مبارک میں حرم مکی کے کتب خانے کے لیے اوقات کا اعلان کر دیا گیا ہے۔ اوقات کار کو دو حصوں میں تقسیم کیا گیا ہے۔ پہلا دورانیہ صبح دس بجے سے سہ پہر تین بجے تک اور دوسرا دورانیہ شام آٹھ بجے سے رات ایک بجے تک ہو گا۔ حرم مکی کے کتب خانے کے ڈائریکٹر جنرل ڈاکٹر احمد بن فہد الشویعر کے مطابق یہ اوقات کتب خانے کا دورہ کرنے والوں اور مطالعہ کرنے والوں کے لیے مقرر کیے گئے ہیں۔

ڈاکٹر الشویعر نے بتایا کہ کتب خانے میں محققین، قارئین اور طلبہ کو مطلوب تمام تر خدمات فراہم کرنے کے انتظامات کیے گئے ہیں۔ اس بات کا پورا خیال رکھا گیا ہے کہ ان افراد کو کتب خانے کے اندر مناسب ماحول میسر آئے۔

الشویعر نے واضح کیا کہ کتب خانے میں آنے والے تمام افراد کو کرونا وائرس سے بچنے کے لیے لاگو کیے گئے تمام احتیاطی اقدامات اور حفاظتی تدابیر کی پابندی کرنا ہو گی۔