تہران میں پراسرا دھماکہ، ایران کا تحقیقات کا اعلان

ایران کےدارالحکومت تہران میں ہونے والے ایک پراسرار دھماکے کے اسباب اور محرکات کے بارے میں جان کاری کے لیے چھان بین کا اعلان کیا ہے۔ ایرانی میڈیا نے جمعہ کی شام کو اطلاع دی کہ دارالحکومت تہران میں ریڈیو اور ٹیلی ویژن ہیڈ کوارٹر کے قریب ایک بہت بڑا دھماکہ ہوا تاہم اس کی مزید تفصیلات سامنے نہیں آئیں۔

نیم سرکاری نیوز ایجنسی ’فارس‘ نے اطلاع دی ہے کہ شمالی تہران میں مقامی وقت کے مطابق جمعہ کی شام ایک دھماکے کی آواز سنی گئی تاہم اس کی تفصیلات سامنے نہیں لائی گئیں۔ یہ معلوم نہیں ہوا کہ اس دھماکے میں کس ادارے کو نشانہ بنایاگیا۔

تہران کے نائب گورنر نے کہا ہے کہ حکام دارالحکومت میں ہونے والے دھماکے کے اسباب کی تحقیقات کر رہے ہیں۔

فارس نیوز ایجنسی نے محکمہ فائربریگیڈ کے ترجمان کے حوالے سے بتایا ہے کہ دارالحکومت کے شمال میں اس علاقے میں فائر فائٹنگ اور ریسکیو ٹیمیں بھیج دی گئی ہیں۔

بدھ کے روز ایک ایرانی عہدیدار نے اطلاع دی تھی کہ جنوب مغربی شہر شوش میں تیل اور گیس پائپ لائن اسٹیشن پر ہوئے دھماکے میں کم از کم 7 افراد ہلاک ہوگئے ہیں۔

شوش کے میئر عدنان غزی نے بتایا کہ دھماکے میں 4 دیگر افراد زخمی ہوئے جنہیں شہر کے اسپتال لے جایا گیا۔