.

سعودیہ ائیرلائن پر یکم ستمبر سے صرف ویکسین لگوانے والےافراد کو اندرون ملک سفرکی اجازت

پہلی اشاعت: آخری اپ ڈیٹ:

سعودی عرب کی سرکاری ائرلائن 'سعودیہ ائیرلائنز ' نے اعلان کیا ہے کہ یکم ستمبر سے قومی ہوا باز کمپنی کی اندرون ملک پروازوں پر ویکسین نہ لگوانے والوں کے سفر پر پابندی لگا دی جائے گی۔

کمپنی کے بیان کے مطابق سعودیہ ائرلائن کے جہازوں میں صرف انہی لوگوں کو سفر کی اجازت ہوگی جنہوں نے کرونا وائرس کی ویکسین کی دو ٹیکے لگوائے ہیں۔

بیان میں مزیدوضاحت کی گئی 12 سال سے کم عمر بچے اور ایسے افراد جو صحت کی بناء پر ویکسین نہیں لگوا سکتے وہ اس شرط سے مبراء ہیں۔

پاکستان سمیت 20 ممالک سے براہ راست پروازیں بحال

سعودی عرب نے اس سے قبل اعلان کیا تھا کہ 20 ممالک سے تارکین وطن کی مملکت واپسی پر عائد پابندی ختم کر دی گئی ہے۔ سعودی حکومت نے ماہ فروری میں پاکستان سمیت 20 ممالک کے باشندوں کو براہ راست سعودی عرب آمد پر پابندی لگا دی تھی تاکہ کرونا وباء پر قابو پایا جاسکے۔

سعودی جنرل اتھارٹی برائے سول ایوی ایشن کے مطابق ایسے تارکین وطن جنہوں نے سعودی عرب روانگی سے قبل کرونا وائرس کی دو ویکسینز لگوا لی ہیں وہ براہ راست پروازوں سے واپس آسکتے ہیں۔

ان 20 ممالک میں پاکستان کے علاوہ متحدہ عرب امارات، لبنان، مصر، بھارت، ارجنٹینا، جرمنی، امریکا، انڈونیشیا، آئرلینڈ، اٹلی، برازیل، پرتگال، برطانیہ، ترکی، جنوبی افریقا، سویڈن، سوئٹزرلینڈ، فرانس اور جاپان شامل ہیں۔