اسرائیلی فوج کی فائرنگ سے زخمی ہونے والا 12 سالہ فلسطینی نو عمر اپنے زخموں کی تاب نہ لاتے ہوئے وفات پاگیا۔
غزہ کی فلسطینی وزارت صحت کے مطابق عمر حسن ابو النائل کو گزشتہ ہفتے کے روز ایک مظاہرے کے دوران اسرائیلی فوجی نے گولی مار دی تھی جس کے نتیجے میں وہ شدید زخمی ہوگیا تھا
غزہ کی سرحد پر اسرائیلی فوج کی جانب سے فائرنگ کے واقعہ میں 21 اگست کو تقریبا 40 افراد زخمی ہوگئے تھے جس میں ایک شخص بدھ کے روز جاں بحق ہوگیا تھا۔
اس مظاہرے کے دوران ایک اسرائیلی فوجی کو بھی گولی مار کر زخمی کر دیا گیا تھا جس کی حالت تشویشناک ہے۔
ان جھڑپوں کے بعد غزہ پر تین میزائل داغے گئے جن کی مدد سے اسرائیلی فوج کے مطابق حماس کے ٹھکانوں کو نشانہ بنایا گیا۔
اس کے علاوہ اسرائیلی فوج نے پیر اور منگل کی درمیانی شب کو بھی غزہ پر بمباری کی تھی جس میں کسی شخص کے زخمی ہونے کی اطلاعات موصول نہیں ہوئی۔
