سعودی عرب: خمیس مشیط پر حوثیوں کے ڈرون حملے کی کوشش ناکام

سعودی عرب کے فضائی دفاعی نظام نے دہشت گرد حوثی ملیشیا کی جانب سے مملکت کے شہر خمیس مشیط کی سمت بھیجے جانے والے ایک (دھماکا خیز) ڈرون طیارے کو فضا میں تباہ کر دیا۔ یہ بات یمن میں آئینی حکومت کے حامی عرب اتحاد نے جمعے کی شام بتائی۔

عرب اتحاد نے باور کرایا کہ حوثی ملیشیا کی جانب سے شہریوں اور شہری مقامات کو نشانہ بنانے کی کوششیں جاری ہیں۔

اتحاد نے زور دیا کہ شہریوں اور شہری مقامات کو دشمن کے حملوں سے بچانے کے لیے عملی اقدامات کیے جا رہے ہیں۔

واضح رہے کہ مملکت میں شہریوں اور شہری مقامات کو نشانہ بنانے کی کوششوں پر کئی عرب اور مغربی ممالک نے حوثی ملیشیا کی بھرپور مذمت کی ہے۔ ان ممالک نے زور دیا ہے کہ وہ سعودی عرب کے امن کے واسطے مملکت کے ساتھ کھڑے ہیں۔

دوسری جانب اقوام متحدہ یمن میں فائر بندی کو مستحکم بنانے کے لیے کوشاں ہے تا کہ مذاکرات کا دوبارہ سے آغاز ہو سکے۔ اس کا مقصد کئی برسوں سے جاری تنازع کے ایک پُر امن حل تک پہنچنا ہے۔