.

سعودی عرب کی اپنے شہریوں کو لبنان کے سفرسے گریز کی ہدایت

پہلی اشاعت: آخری اپ ڈیٹ:

بیروت میں حالیہ ایام میں ہونے والی کشیدگی کے بعد سعودی عرب نے اپنے شہریوں کو لبنان کے سفر سے گریز کی ہدایت کی ہے۔

سعودی وزارت خارجہ نے لبنان میں شہریوں پر زور دیا کہ وہ احتیاطی تدابیر اختیار کریں اور رش والے مقامات اور مظاہروں سے دور رہیں۔

بیان میں کہا گیا ہے کہ لبنان کے موجودہ حالات کو دیکھتے ہوئے ہم تمام معزز شہریوں پر زور دیتے ہیں کہ وہ متعلقہ حکام کی طرف سے جاری کردہ ہدایات پر عمل کریں تاکہ لبنان سمیت بعض ممالک کا سفر نہ کریں۔ شہریوں سے کہا گیا ہے کہ وہ کسی بھی مشکل کی صورت میں سعودی سفارت خانے سے رابطہ کریں۔

خیال رہے کہ گذشتہ جمعرات کو بیروت کے بعض علاقوں میں لبنانی حزب اللہ اور امل تحریک کے عناصر اور سیکیورٹی اداروں کے درمیان جھڑپیں ہوئی تھیں۔ اس موقعے پر مشین گنوں، راکٹوں اور دیگر بھاری اسلحہ کا استعمال کیا گیا تھا۔

یہ احتجاج بیروت بندرگاہ میں ہونے والے خونی دھماکوں کے کیس کی تحقیقات کرنے والے جج طارق بیطارکو کیس سے الگ کرنے کے لیے کیا گیا تھا۔