بغداد: چار ماہ کے وقفے کے بعد گرین زون پر راکٹ حملہ

عراق کے دارالحکومت بغداد میں آج اتوار کو علی الصبح المنصور کے علاقے کئی متعدد راکٹ آ کر گرے۔ یہ علاقہ گرین زون کے حساس ترین علاقے کے نزدیک واقع ہے۔ گرین زون میں امریکی سفارت خانہ اور عراقی حکومتی صدر دفاتر واقع ہیں۔

سیکورٹی ذرائع کے مطابق مذکورہ علاقے میں 3 کیٹوشیا راکٹ گرے جس کے نتیجے میں زور دار دھماکے ہوئے۔

ذرائع کا کہنا ہے کہ واقعے میں کوئی زخمی نہیں ہوا تاہم ایک شہری کی گاڑی اور ایک عمارت کی بیرونی دیوار کو نقصان پہنچا۔

تقریبا چار ماہ بعد گرین زون کے نزدیک راکٹوں کے گرنے کا یہ پہلا واقعہ ہے۔

یاد رہے کہ عراقی حکام نے ہفتے کے روز بغداد کے علاقے الشعلہ میں راکٹ لانچنگ پیڈ ضبط کیا تھا۔ پیڈ میں کیٹوشیا راکٹ موجود تھے۔

واشنگٹن کی جانب سے الزام عائد کیا جاتا ہے کہ ان حملوں کے پیچھے عراقی مسلح گروپ ہیں جن کا ایران سے رابطہ ہے۔ یہ گروپ عراق سے امریکی افواج کے کوچ نہ کرنے کی صورت میں ان افواج کو نشانہ بنانے کی بارہا دھمکی دے چکے ہیں۔

رواں سال 26 جولائی کو بغداد اور واشنگٹن کے بیچ ایک معاہدہ طے پایا تھا۔ اس کے تحت رواں سال کے آخر تک عراق میں لڑائی کے لیے موجود امریکی افواج کوچ کر جائیں گی۔ اس کے باوجود وقتا فوقتا حملوں کا سلسلہ جاری ہے۔