.

لبنانی وزیر اطلاعات کا عرب مسائل سے متعلق موقف غیرذمہ دارانہ ہے: قطر

پہلی اشاعت: آخری اپ ڈیٹ:

قطر کی وزارت خارجہ نے خلیجی ممالک کے ساتھ بحران کو ہوا دینے والے لبنانی وزیر اطلاعات جارج قرداحی کے بیان پر "گہری تشویش" کا اظہار کرتے ہوئے اس کی شدید مذمت کی ہے۔

قطری وزارت خارجہ کی طرف سے جاری ایک بیان میں کہا گیا ہے کہ لبنانی وزیر اطلاعات قرداحی کے بیانات ان کے ملک اور عرب مسائل کے تئیں ایک غیر ذمہ دارانہ موقف ہے۔

وزارت خارجہ نے اس بات پر زور دیا کہ لبنانی وزیر کو اپنے ملک کو غیر ملکی بحرانوں میں نہیں ڈالنا چاہیے تھا۔

قطر نے لبنانی حکومت سے مطالبہ کیا کہ اس سلسلے میں ضروری اقدامات اٹھائے اور پڑوسی ممالک کے درمیان جاری تناؤ کو ختم کرنےکے لیے ٹھوس اقدامات کرے۔

خیال رہے کہ لبنانی وزیر اطلاعات کے متنازع بیان پر سعودی عرب نے لبنان کے ساتھ سفارتی تعلقات معطل کرتے ہوئے لبنانی سفیر کو 48 گھنٹوں کے اندر اندر ملک چھوڑنے اور بیروت میں تعینات اپنے سفیر کو واپس بلانے کا اعلان کیا تھا۔ سعودی عرب نے لبنان کے ساتھ ہر طرح کی درآمدات بھی معطل کر دی ہیں۔

سعودی عرب کے بعد متحدہ عرب امارات اور بحرین نے بھی بیروت سے اپنے سفیر واپس بلا لیے ہیں۔