اماراتی قومی دن کی تقریبات کے لئے کرونا ایس او پیز جاری کر دئیے گئے

متحدہ عرب امارات کی وزارت صحت نے ملک کے 50 ویں قومی دن کی تقریبات کے لئے کرونا وائرس کے تازہ ترین قوائد وضوابط جاری کر دئیے ہیں۔

متحدہ عرب امارات کی قومی ایمرجنسی کرائسز اینڈ ڈیزاسٹر مینجمنٹ اتھارٹی [NCMA] کے ہفتہ وار اجلاس میں بتایا گیا کہ اماراتی شہریوں اورمقیموں کو کسی بھی تقریب میں شرکت کے لئے 96 گھنٹے سے کم عرصہ قبل پی سی آر کرونا ٹیسٹ کروانا لازمی ہے۔ اس کے علاوہ بند کمروں یا ہال میں ہونے والی تقریبات اور پرہجوم مقامات پر ماسک لگانا لازمی ہے۔

ہر ایونٹ پر شرکاء کے جسمانی درجہ حرارت کو چیک کیا جائے گا اور ہر شخص کو ڈیڑھ میٹر سماجی فاصلے کی پابندی کرنا ہوگی۔ سماجی فاصلے کا قانون ایک ہی خاندان کے لوگوں پر لاگو نہیں ہوتا۔

ایونٹ سے 14 روز قبل ویکسین لگوانے یا الحصن ایپ پر گرین اسٹیٹس رکھنے والے تمام عمر کے افراد کو تقریبات میں شرکت کی اجازت ہے۔

اتھارٹی نے ٹوئٹر پر ایک پیغام میں کہا کہ " محفوظ طریقے سے قومی دن کی خوشیاں منائیےتاکہ کرونا کے سد باب کے لئے کی جانے والی کوششوں کے ثمر کو محفوظ رکھا جاسکے۔"

متحدہ عرب امارات میں یوم الشھید 30 نومبر جبکہ قومی دن 2 دسمبر کو منایا جائے گا۔