سعودی دارالحکومت میں منگل کے روز "ریاض انٹرنیشنل لگژری ویک" کا آغاز ہو رہا ہے۔ یہ ایونٹ 9 سے 12 نومبر تک جاری رہے گا اور اس میں مختلف نوعیت کی سرگرمیوں کا انعقاد ہو گا۔ ایونٹ میں پُر تعیش اور بیش قیمت مصنوعات تیار کرنے والی 60 سے زیادہ عالمی کمپنیاں شریک ہوں گی۔
ریاض کے ہوٹل الفیصلیہ میں منعقد ہونے والا یہ ایونٹ مشرق وسطی میں پر تعیش مصنوعات کا سب سے بڑا بازار ہو گا۔ ایونٹ میں دنیا کے مشہور ترین برانڈز اپنی مصنوعات پیش کریں گے۔ ان مصنوعات میں زیورات ، گھڑیاں اور شادی کے موقع پر دولہا دلہن سے متعلق لوازمات شامل ہیں۔
ایونٹ میں 15 ممالک کی مشہور و معروف کمپنیاں اپنے تیار کردہ زیورات اور گھڑیاں نمائش کے لیے رکھیں گی۔ ان ممالک میں فرانس، اطالیہ، سوئٹزرلینڈ اور امریکا نمایاں ترین ہیں۔ پیش کی جانے والی گھڑیوں میں بعض منفرد گھڑیوں کی قیمت 10 لاکھ ڈالر سے بھی زیادہ ہے۔
اس حوالے سے ریاض انٹرنیشنل لگژری ویک کے چیف ایگزیکٹو عبدالرحمن الزیر نے کہا کہ "ہمارے لیے یہ بات قابل افتخار ہے کہ ہم ویژن 2030 پروگرام میں کردار ادا کر رہے ہیں۔ اس کا مقصد مملکت کو دنیا کی 10 بڑی معیشتوں کی صف میں لا کھڑا کرنا ہے"۔
